ООУ„Тошо Велков – Пепето“ од Кавадарци е училиште во кое се воспитуваат и образуваат ученици од прво до деветто одделение. Во состав на училиштето работи и подрачно училиште во населба Глишиќ.
ВИЗИЈАТА за „Модерно и современо училиште со позитивна клима за работа и меѓусебно почитување, кое создава успешни , хумани и креативни граѓани коишто придонесуваат за развој на општеството“ e веќе реалност со менаџирањето на Директорката Ѓурѓица Алексова и заложбите на сите вработени во училиштето.
За нас модерно и современо училиште значи современи услови за престој и работа на наставниците и учениците, реновирани и креативно опремени училници и кабинети, пријатни простории за продолжен престој, уреден и чист училишен двор, но и квалитетен и едуциран наставнички кадар.
За условите во кои се образуваат и воспитуваат учениците зборува и државната награда „Најчисто и најбезбедно училиште во Р.Македонија“ која на училиштето му беше доделена од страна на Министерството за образование и наука и Канцеларијата на ОБСЕ во Скопје.
За успешно реализираната редовна настава, каде ученикот секогаш е во центарот на вниманието, кажуваат освоените награди на учениците на општинско, регионално, државно и меѓународно ниво. За стимулирање на ваквите ученици, по иницијатива на Директорката беше формиран „Фонд за талентирани ученици“ преку кој редовно се наградуваат и пофалуваат учениците кои се истакнуваат со своите постигнати резултати.
Во училиштето покрај редовната настава, голем акцент се става и на воннаставните активности, општествено – хуманитарната работа и училишните секции, кои претставуваат интегрално и мошне значајно подрачје во вкупната воспитно – образовна дејност на училиштето .
Во соработка со Локалната самоуправа, невладини организации и фондации во училиштето се организираат голем број културни настани како Априлијада, Тиквешки гроздобер, Велигденски хепенинг и сл. Хуманитарните активности се иста така важен сегмент од работата на училиштето и се реализираат редовно ( Новогодишен хуманитарен концерт, Проект „Промоција на хумани вредности“.) преку кој учениците се поттикнуваат на хуманост и солидарност.
Во нашето училиште е застапена и интеграцијата на еколошката едукација во наставата и се преземаат конкретни активности за заштита на животната средина, заради што училиштето е добитник на зелено знаме и е прогласено за ЕКО училиште. Тука би го истакнале натпреварот Еко пакет на кој нашите ученици освоија втора државна награда и со добиените парични средства и подршка од училиштето беше изграден Летниковец за настава во природа . Како еко училиште добивме можност и остваривме партнерство со еко училиште во Латвија (Икскилес Бривашкола) со кое ќе се реализираат голем број заеднички активности .
Во училиштето се реализираат и одредени проекти како во соработка со Министерство за образование и наука, Бирото за развој, така и со невладини организации и фондации, како „Чекор по чекор“, „Песталоци“, Коалиција СЕГА и други.
Тоа се проектите „Заедничка грижа за правилно насочување на учениците“ , „Со читање до лидерство“, „Вештини за адолесценција“ „Дете правобранител “ „Имплементација на Конвенцијата на правата на детето во Македонија“ и „Проект за социјална инклузија“
Овие проекти имаат за цел јакнење на воспитната компонента во воспитно – образовниот процес и стекнување на одредени ставови и вештини кај учениците.
На крајот би сакале да истакнеме дека сето ова не прави горди , но преставува и голема одговорност, па затоа Директорката, стручната служба, наставниот кадар и сите вработени во училиштето, посветено работат и се стремат за постигнување на уште повисоки цели.
